‘Workshop’ Ombudsman tokante transparensia di gobernashon
Dia 14 di òktober 2022 Ombudsman di Kòrsou, sr. Keursly Concincion, a organisá un ‘workshop’ na Avila Hotel tokante e tópiko di transparensia di gobernashon, destiná pa empleadonan di sektor públiko. E ‘workshop’ a tuma lugá for di 10 or di mainta te 4 or di atardi.
Durante di e ‘workshop’ a pone énfasis riba entre otro e importansia di transparensia di gobernashon pa funshonamentu demokrátiko di nos komunidat. Den e kuadro aki a para ketu tambe na e importansia di e echo pa informashon ku tin di haber ku maneho di gobernashon, ta disponibel pa un i tur ku pidi esaki.
E partisipantenan a haña informashon amplio tokante di e ordenansa ‘Landsverordening openbaarheid van bestuur Curaçao’, ku ta e lei ku ta duna e reglanan básiko tokante di transparensia di gobernashon na Kòrsou. Bou di guia di e eksperto ku Ombudsman a invitá pa duna e workshop, e partisipantenan a haña e oportunidat pa traha ku e lei i mira kon esaki por keda apliká den práktika.
Na final di e workshop e partisipantenan por a disfrutá di un interkambio sosial.