Ombudsman preokupá pa kasonan di abusu seksual kontra menornan di edat
Ombudsman di Kòrsou a tuma nota ku preokupashon via di medionan di komunikashon lokal di diferente kaso di abusu seksual kontra menornan di edat. E desaroyo aki naturalmente ta hopi alarmante, i e tin konsekuensianan permanente i severo pa e hobennan ku ta bira víktima den e kasonan aki.
Muchanan i hobennan den nos komunidat meresé di keda protehá mas tantu posibel kontra di tur forma di abusu i maltrato. Adultonan, prinsipalmente esnan den funshonnan di poder manera den gobièrnu i parlamento di un pais, tin e obligashon pa hasi tur loke ta nesesario pa garantisá ku tur menor di edat por krese den un ambiente seif i ku ta stimulá tambe nan desaroyo di forma optimal.
Ta importante pa purba prevení situashonnan di abusu seksual, pero e ta importante tambe pa na momentu ku un tragedia asina tuma lugá, pa investigá e kasonan aki ku e rapides i diligensia nesesario pa por solushoná esakinan. Naturalmente e ta hopi importante pa yuda e víktimanan den e kasonan aki mas miho posibel via di tur kanal nesesario i ku tur e medionan disponibel, pero e ta importante tambe pa kastigá di forma severo esnan ku ta hasi nan mes kulpabel na e delitonan aki.
Den e kuadro aki ta importante pa Gobièrnu di Kòrsou duna atenshon i reakshoná riba e rapòrt tokante abusu seksual kontra menornan di edat ku Ombudsman a skibi na aña 2018 [i ku a keda saká riba 29 di mart 2018]. Tambe ta importante tambe pa Gobièrnu di Kòrsou tuma un desishon riba e diferente kartanan [fechá 10 di mart 2017, 9 di mei 2017 i 29 di mei 2017] ku Ombudsman a manda i den kua a pidi pa bini ku e asina yama ‘meldcodes’ ku lei ta preskribí. Falta di e ‘meldcodes’ aki ta stroba profesionalnan di por aktua kontra abusu di menornan di forma diligente i strukturá, ku tur e konsekuensianan ku esaki por tin.
Finalmente Ombudsman ta enfatisá ku ta súmamente importante pa riba termino kòrtiku e akshonnan nesesario keda tumá pa garantisá seguridat di tur hoben i mucha ku ta biba na Kòrsou.