Ombudsman di Kòrsou skohé komo Presidente Regional pa Karibe i Latino-Amerika
E Instituto Internashonal di Ombudsman (IIO), lantá na aña 1978, ta e úniko organisashon mundial pa koperashon di institutonan independiente di ombudsman, den kua tin mas di 200 miembro ku ta operá riba nivel lokal, regional, i nashonal i ta prosedente di mas di 100 pais. E meta principal di IIO ta pa yuda su miembronan protehá siudadanonan kontra violashon di nan derechinan (humano), abusu di poder, desishonnan deshonesto i mal gobernashon.
E region di Karibe i Latino-Amerika di IIO, un di e seis regionnan, a skohe riba 24 di yüni 2024, Ombudsman di Kòrsou, sr. Keursly Concincion, komo Presidente Regional. Sr. Concincion tabata e úniko kandidato pa e puesto. E nombramentu ta pa un periodo di kuater aña.
Sr. Concincion, kende ta Ombudsman di Kòrsou for di aña 2015, ta miembro di e direktiva mundial di IIO komo Direktor Regional pa e region di Kariba i Latino-Amerika for di aña 2019. E region di Karibe i Latino-Amerika tin 30 miembro i ta konsistí di kasi 500 miyon habitante.
