Akseso menornan di edat na awa limpi

Ombudsman di Kòrsou, tambe den su ròl komo Ombudsman pa Mucha for di aña 2020, ya pa algun aña kaba a bin ta ekspresá su preokupashon tokante e pèrdida di akseso na awa limpi di famianan lokal, i den e kuadro aki a bati bèl serka gobièrnu na varios okashon. Pa e motibu aki desaroyonan lokal, pero tambe internashonal i den Reino riba e tereno di derechi riba akseso na awa limpi ta keda siguí ku hopi interes.

Un desaroyo resien ku ta importante ta e echo ku un desishon inovadó di Korte di Apelashon di Den Haag, den kua hues a disidí tokante e derechi humano di menornan di edat riba akseso na awa limpi, entretantu a bira irevokabel mirando ku e término pa bai den kasashon a ekspirá.

Korte di Apelashon di Den Haag a indiká den su desishon di 19 di mart 2024 (den resumen) ku den e kaso ku leinan i maneho ta permití den práktika ku akseso na awa limpi di menornan di edat por keda kitá na momentu ku mayornan/kuidadornan no paga nan faktura, esaki ta resultá den violashon di e disposishonnan di tratadonan internashonal (manera e Tratado Europeo pa Derechinan Humano i e Tratado Internashonal pa Derechinan di Mucha) i di e norma di kuido sosial den Kódigo Sivil.

Toegang minderjarigen tot schoon drinkwater

Korte di Apelashon di Den Haag den su desishon ya menshoná a indiká tambe eksplísitamente ku den e kasonan kaminda ya kaba awa limpi a keda kitá i ta konosí òf rasonablemente por tabata konosí ku tin un òf mas menor di edat, e akseso na awa limpi mester keda restablesé òf lo mester suminstrá un kantidat di awa ku ta konforme e norma ku World Health Organization ta stipulá mientras no habri e awa bèk.

E desishon irevokabel aki di hues ta importante pa tur menor di edat den Reino, teniendo kuenta ku Statuut di Reino. Ombudsman lo pone e desaroyonan aki na konosementu di gobièrnu di Kòrsou i ta wak ku hopi interes kiko e desishon aki ta bai nifiká pa menornan di edat na Kòrsou.